गोधुली र मिर्मिरेमा
खुसीका बहारहरूसँगै
सुसाउँदै बग्ने रहर
नदीलाई मात्र कहाँ हुन्छ र ?
पेटमा लेउ लाग्नेहरूलाई
सडकमा छेउलाग्नेहरूलाई
इन्द्रेणी सपना बोकेर
आफ्नै पाइला माथि टेकेर
छङ्छङ् गर्दै बग्ने रहर कत्ति होला ?
के थाहा तिमीलाई
पेटमा लागेको लेउ
अनि आँगनमा टल्किएको कार्पेटमा
कुनको अस्तित्व कति हुन्छ ।
उसले भोकै बसेर
तिमीलाई नअघाएको भए
कसरी तिमी सोख बोकेर
आलिसानको जीवन बाँच्थ्यौ ?
जीवनको वास्तविकता खोज्नेहरू
बनाउटी जीवनमा बाँच्नेहरू भन्दा
धेरै फरक हुन्छन्
पल्टाएर उसका भोगाइहरू
पढेर हेर्न सक्छौ
तिमीले पनि
कहाँनेर कत्ति टुक्रिएको हुन्छ ।
