-प्रकाश अधिकारी
लक्ष्मण रेखा तोडेर
रामणले सीता हरे जस्तो
म मेरी आमा हर्न दिन्न
मातृत्व उनको
छाती भरी छचल्किन्छ मेरो ।
तिमी सँगको लडाईँमा
फाटेका पैताला
टाउकाका टुटुल्काहरु
दुख्दैन मेरो
मातृत्व भन्दा बढी ।
छिमेकी भएर
छिमेकीकै घरको
छानो भत्काउँदै छौ तिमी
तोडेर हुँदैन सम्झौता ।
वीरहरुको रगत
र पसिना पोखिएको छ
मैले टेकेको माटोमा,
यही माटोमा
फुल्छु फल्छु
यही माटो प्रिय लाग्छ ।।
खुम्चिन दिन्न
आमाको छाती,
तिमीले लछारेर
पछारिने छैन
सगरमाथाको छोरो हूँ
पशुपतिको आशीर्वाद
बुद्धको ज्ञान
लिएर बाँचेको
म एउटा नेपाली ।।