११ असोज, काठमाडौं । सरकारले पेट्रोलियम पदार्थको मुल्य वृद्धि गरेको, सार्वजनिक यातायातको भाडा १०% ले वृद्धि गरेको र यातायात सिण्डिकेट हटाउन अझै खुट्टा कमाएको विरोधमा सत्तारुढ नेकपाकै भातृ संगठन आन्दोलनमा उत्रिएको छ । पूर्व माओवादी निकट विद्यार्थी संगठन अनेरास्ववियू क्रान्तिकारीले नयाँ बानेश्वरस्थित यातायात ब्यवस्था विभागको कार्यालय अगाडि बुधबार २ घण्टा धर्ना तथा घेराउ गरेको हो ।
घेराउपछि अखिल क्रान्तिकारीका नेताहरुले यातायात ब्यवस्था विभागका महानिर्देशक लावन्नेप्रसाद ढकाललाई भाडा वृद्धि फिर्ताको मागसहित ज्ञापनपत्र पनि बुझाएको क्रान्तिकारीका सचिव पवन कार्कीले बताए ।
अखिल क्रान्तिकारीको ३ नम्बर प्रदेश समितिको आयोजनामा भएको प्रदर्शनमा केन्द्रीय उपाध्यक्ष विजय गौतम र सचिव पवन कार्कीले भाडावृद्धि फिर्ता नभएसम्म आन्दोलन नरोकिने बताए।
यातायात व्यवसायी समितिसँगको सहमतिअनुसार सरकारले हालै सार्वजनिक यातायातमा १० प्रतिशत भाडा बढाएको छ । भाडा वृद्धिसँगै महंगीसमेत बढेको भन्दै सरकारको आलोचना भइरहेको छ ।
